قادتني أقداري لركوب ميكروباص عجيب الأطوار، بداية من تهالك السيارة ومرورا بعدم صلاحية المقاعد للآدميين، وانتهاءً بسائقه "المونون" الذي يشكو لصاحبه مأساة أصحاب "المزاج العالي" في البحث عن "الحشيش"، وعن غير قصد وجدنا أنفسنا أمام "ديالوج" جدير بالتسجيل، فكان هذا حوار بين السائق وصديقه في رحلة رصدها مراسل "محيط" من ميدان رمسيس الى منطقة الوراق .
الغريب أن هذا الحوار كشف إلى حد كبير مدى التفاهم والتناغم في المصطلحات بين افراد عالم ادمان المخدرات والسائقين، مع الاحترام التام لفئة السائقين فمنهم الشرفاء والمكافحين، لكننا نتحدث عن فئة معينة لا تستقيم حياتها الا بالمخدرات والتباهى بتعاطيها وبطولات مقاومة الشرطة فيها رغم الاحكام الأمني الشديد الذي تقوم به وزارة الداخلية المصرية لاسقاط بؤر واوكار تجارة المخدرات والذى كان هذا الحوار هو شهادة من متعاطى مخدرات على الدور الشرطى المتميز فى اسقاط اوكار المخدرات:
السائق : مساء الفل يا عم اشرف انت فين ياسطى من زمان محدش بيشوفك
اشرف : انت اللى واحشنى ياسطى والله كنت بقالى يومين فى مشاكل انا و محمود فرخة وعلى البرنس.
السائق : ليه يا أسطى.
اشرف : العيال كانت الحكومة ماسكاهم بسيجارتين حشيش وراحو عالاستيفا لولا "دولار" لحقنا الراجل ده ميه ميه .
السائق : فعلا حد يا شقيق ميه ميه ورجولة جدا .
اشرف : الحكومة مبهدلة الدنيا اليومين دول يا صحبي ما فيش ولا حتة حشيش فى السوق كله .
السائق : والله معاك حق انا اول امبارح كنت مع اشرف زيد والواد هيمة كرعو واحنا التلاتة بنضرب فى نص صباع شفت لما تلاتة ضريبة ياكلوا نص صباع .
اشرف : والله انا قالب الدنيا ومش لاقى عارف ليه يا شقيق ؟
السائق : ليه يا صحبي
اشرف : بيقولك الجيش نزل ومبهدل السوق ومش مخلى ولا حتة حشيش حد يصدق كده .
السائق : لسة ماسكين اخو الواد شريف زعبله اول امبارح فى روض الفرج عند السوق ب36 كيلو وطبيعى لما الكبار بيتمسكو اللى زى شريف مش هايلاقى واللى وراه مش هايلاقى حد يشترى منه معرفش الحكومة مش عايزة تسيب الناس تاكل عيش ليه وسمعت امبارح انهم ماسكين 4 طن فى امبابة .
اشرف : اسكت يا على والمصحف الشريف ولا عضمى يبقي زى النار دى ـ يقصد سيجارته المشتعلة ـ من اسبوع كنت راكب توك توك عند السنترال الساعة 3 الفجر كده وكان فيه لجنة وكان معايا حتة صغيرة ـ يقصد حشيش ـ قمت طلعت حديدة وغزيتها فى كتف الواد سواق التوك توك وقلت له اجرى الواد حاول يجرى معرفش وعاديك يا شقيق "خلونى مثلت فيلم الارض" .
السائق : ههههههههههه ياعم طب كنت تكلم دولار وهو يخرجك .
اشرف : يا صحبي ماهو كان واقف ولولاه كنت سافرت أبو زعبل .
السائق : عمل معاك الواجب والصح؟
اشرف : ميه ميه راح للباشا وقالله يا باشا ده اهله ممكن يقتلونى فى الموقف لو ماسبناهوش بس الباشا قالله ما ينفعش يا دولار اسيبه بس ما تخافش عليه وسابونى بعد يومين ، بس يا شقيق لو كانت اتعملت اتجار كنت (........) وطبعا قال لفظا لا نجرؤ على نشره .
يتوقف السائق عن الكلام ويقول لاحد الركاب كان يهم بالنزول ياللا عالـ" السخان " كده اللى نازل .
السائق : من اسبوعين برضه مسكوني بسيجارة ولولا "دولار" كنت اتسحلت
اشرف : ياعم احمد ربك انك ما قضيتش وأهم من ده كله إنك ما تسجلتش .
السائق : والله يا اشرف قعدتى مع ابنى بالدنيا كلها يعنى اتفو على سجارة معفنة دفعت فيها 500 جنيه كنت قعدت مع ابنى وبيتى اولى بيها .
اشرف : والله يا اشرف الواحد نفسه حاله يتصلح شوية نفسي أركب "عجل" ـ والعجل هو مصطلح السائقين على الميكروباص ـ بقى، زهقت من الشغل عند الناس، اسكت يا علوة معايا عيال فى محو الامية مسجلين خطر .
يشير احد الركاب فى الشارع للسائق بالتوقف ويقول السائق للتباع هات " النص جنيه اللى على الارض ده " فى اشارة الى قيمة الاجرة التى سيدفعها الراكب .
السائق : انت فى محو الامية يا شقيق عشان الرخصة ؟
اشرف : اه يا عم نفسي اعمل "خصاية" ـ رخصة قيادة درجة ثالثة ـ ومش عارف عشان الشهادة .
السائق : نفسنا نمشي صح بقي يا علي، العيال بتكبر والواحد ماعمللهمش اى حاجة والله ساعات بقرف من نفسي لما اروح اشترى حشيش وابنى عايز فلوس الدرس واقوله ماعييش .
وإلى هنا أدرك شهريار الصباح فسكت عن الكلام المباح، ووصلت لمكان العمل وكم كنت سعيدا بهذه النهاية التي ربما تعني أنهم يفكرون في عمل "الصح" بحسب لغتهم.
أرسل
رداً
طباعة
